Հայկական գինու շնորհանդես

11 մայիսի, 2022

2022թ. մայիսի 11-ին դեսպան Բաբախանյանը մասնակցեց Նյու Դելիի Լիլա հյուրանոցում կազմակերպված գինի արտադրող երկրների շնորհանդեսին, որի ընթացքում ներկայացվեց հայկական «Վանարդի» գինին: Միջոցառմանը, որը կազմակերպված էր Հնդկաստանի հեղինակավոր «Ռիտու գրուպ» ընկերության կողմից /զբաղվում է գինու և շամպայնի ներմուծմամբ, ինչպես նաև հրատարակում է «Fine wine and champagne India» ամսագիրը/ մասնակցում էին Ֆրանսիայի, Բրիտանիայի, Պորտուգալիայի, Ավստրիայի, Արգենտինայի, Վրաստանի և մեկ տասնյակ այլ երկրների դեսպաններ, գինու արտադրողներ և փորձագետներ: Միջոցառումն անցկացվեց ճաշի ձևաչափով, որի ընթացքում տարբեր երկրների դեսպանները ներկայացրեցին իրենց երկրներում արտադրված գինիները, դրանց ստեղծման պատմությունը և առանձնահատկությունները: Ներկայացմանը զուգահեռ ներկաներին մատուցվում էր համապատասխան երկրի գինին:

Իր ելույթում դեսպան Բաբախանյանը խոսեց հայկական գինու հազարամյա պատմության, Վայքում պեղած 6100-ամյա պատմություն ունեցող գինեգործական համալիրի մասին, ինչպես նաև ներկայացրեց Հայաստանում վերջին տարիներին բուռն զարգացում ապրող գինեգործության բնագավառը և դրա նշանակությունը զբոսաշրջային ծրագրերի զարգացման առումով: Ապա ներկաներին մատուցվեց «Վանարդի» գինին, որն արժանացավ բարձր գնահատականների՝ թե´ դիվանագետների, և թե´ ներկա փորձագետների կողմից: Շեշտելով, որ այս գինին ներմուծվում է մի շարք երկրներ, դեսպանը հույս հայտնեց, որ մոտ ապագայում այն կհայտնվի նաև հսկայական հնդկական շուկայում:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր